Početak ljetnje sezone privlači sve veći broj turista, i dok većina gravitira primorju ima i onih koji žele da svjedoče ljepotama planina Crne Gore. Međutim, na putu do planinskih vrhova mogu se desiti nezgode koje zahtjevaju intervenciju stručnih timova. Na sreću, Gorska služba spašavanja Crne Gore (GSS) je uvijek spremna da izađe na teren.

Ekipa koja aktivno radi na spasavanju povrijeđenih ili izgubljenih u planinskim vrhovima proteklih 60 godina, prethodne sezone imala je pune ruke posla, a sličan broj intervencija očekuju i ovog ljeta, budući da se broj turista povećava.

Iako uvjek može bolje, oprema je u dobrom stanju, te su ekipe potpuno spremne za bilo koji vid akcije.

GSS trenutno broji oko 60 aktivnih članova koji djeluju na volonterskoj osnovi, a priključuje im se i sve veći broj mladih.

U kategorizaciji planina i vrhova, ne postoje manje ili više opasna odredišta. Nezgode koje se mogu desiti često su izazvane ljudskim neznanjem ili nedovoljnom pripremljenošću. Stoga, iz Gorske službe spasavanja savjetuju sve avanturiste da dobro procijene sopstvene sposobnosti prije nego se odluče  za planinarenje, kako bi izbjegli nemile situacije. A ukoliko do njih ipak dođe, ekipe će promptno stići u pomoć.